രസമുള്ള കാലമാണത്,
ഉറങ്ങാതിരിക്കാം, ചിലപ്പോൾ ഉണരാതിരിക്കാം,
തടസ്സങ്ങളൊന്നുമില്ല.
തണലിനും ചാരിയിരിക്കാനും
പാതിയുണങ്ങിയ മുൾച്ചെടികൾ മാത്രമുള്ള,
വരണ്ട ഭൂമിയെ പകുത്തുചെല്ലുന്ന
വഴിയരികിലെ വിശ്രമമാണത്.
കൊടിയ വേനൽക്കാട്ടിൽ
നീരോർമ്മയിൽ പൊള്ളുന്ന
തടിനിയുടെ കരയിലൊരു
നിതാന്തധ്യാനത്തിന്റെ ഒറ്റക്കാൽനിൽപ് !
പലരാത്രികൾ പകലുകൾ
ഇരുണ്ടുനിന്നിടമുറിയാതെ പെയ്യുന്ന
മഴയെ നോക്കിയിരിക്കലാണത്.
വിശപ്പിനെ, മടുപ്പിനെ, പേടിയെ പോറ്റുന്ന
വറുതിയുടെ ദിനരാത്രങ്ങൾ പോൽ.
പറയാൻ മറന്ന വാക്കുകളെയൊരു
പുതപ്പിനുള്ളിൽ ചേർത്ത്
പഴംകഥകൾ പറഞ്ഞുറക്കാതിരിക്കൽ.
ഓർമ്മപ്പെടുത്തലുകളിൽ
പ്രതീക്ഷയുടെ വിത്തുകളുണ്ട് !
പോയകാലം പോലെയൊന്നാണ്
വരനുള്ളതെന്നാവർത്തിച്ചു പറയാം.
വിശ്വാസങ്ങളെ ഹിപ്നോടൈസ് ചെയ്തും
ബോധത്തെ സത്യം ചെയ്യിപ്പിച്ചും
യഥാതഥ്യത്തെ മതം മാറ്റാം.
മനസ്സൊരു മടിയന്‍കുട്ടിയായ്
കണ്ണടച്ചിരിക്കുമ്പോൾ കേൾക്കാം
മോഹങ്ങളുടെ മണിക്കിലുക്കം
നായികയും പാട്ടും നല്ല ലൊക്കേഷനും
ഒരിക്കലും കട്ട് പറയാത്ത സംവിധായകനും.
മഞ്ഞവെയില്‍ സായാഹ്നങ്ങളില്‍
മാനം നോക്കിയിരുന്നാല്‍ കാണാം
സ്വപ്നങ്ങളുടെ പുറപ്പാട്.
എന്തോരം തൊങ്ങലും
തോരണങ്ങളുമാണെന്നോ !
നിറങ്ങളേഴല്ലായിരമാണെങ്ങും !
ഒരു നിമിഷം പോലും
ആരോടും പങ്കുവെയ്‌ക്കേണ്ടതില്ലാത്ത
എങ്ങോട്ടു തിരിഞ്ഞാലും തഞ്ചങ്ങളുള്ള
ഈയൊറ്റയാൾ അവധിക്കാലം
നല്ല രസമുള്ള കാലമാണ് !
